ადამიანის უფლებათა ევროპულმა სასამართლომ გამოაქვეყნა გადაწყვეტილება საქმეზე - საქართველო რუსეთის წინააღმდეგ.

სტრასბურგის სასამართლომ რუსეთის მხრიდან ადამიანის უფლებათა ევროპული კონვენციის არაერთი დარღვევა დაადგინა და ე.წ. „განგრძობადი ოკუპაციის საქმეზე“ რუსეთს დააკისრა სრული პასუხისმგებლობა ოკუპირებულ ტერიტორიებსა და საოკუპაციო ხაზის გასწვრივ საქართველოს მოსახლეობის მასობრივი შევიწროების, დაკავების, თავდასხმების, მკვლელობებისა და ამგვარი ფაქტებისთვის, რომელიც საქართველოს ტერიტორიების ოკუპაციისა და ე.წ „ბორდერიზაციის“ ფონზე მიმდინარეობს.

საქართველოს იუსტიციის სამინისტროში განაცხადეს, რომ „სტრასბურგის სასამართლოში ე.წ. განგრძობადი ოკუპაციის საქმეზე საქართველომ რუსეთის წინააღმდეგ ისტორიული გამარჯვება მოიპოვა“.

სტრასბურგის სასამართლოს გადაწყვეტილებას მმართველი გუნდი ისტორიულს უწოდებს, მათი თქმით სიმბოლურია, რომ ამ გადაწყვეტილების გამოცხადება 9 აპრილს დაემთხვა.

განცხადებები გაკეთდა ოპოზიციურ ფლანგზეც - დეპუტატების განცხადებით, ამ ფაქტით კიდევ ერთხელ დადასტურდა, რომ რუსეთისგან დასაცავად ევროპა საქართველოს პირველი მეგობარია.