სტუდენტური მოძრაობა „თავისუფლებისთვის“ დამფუძნებელი ნიკო მანაგაძე პრემიერ-მინისტრ ირაკლი კობახიძის ლექციის ჩაშლას შეეცადა.

თბილისის სახელმწიფო უნივერსიტეტის წინ მანაგაძემ თანამოაზრეები შეკრიბა, რის შედეგადაც უნივერსიტეტთან ფიზიკური დაპირისპირება მოხდა.

გავრცელებული ინფორმაციით, მანაგაძემ პრემიერის ლექციის ჩაშლა რამდენიმე დღით ადრე დაგეგმა და სტუდენტებს ლექციის ჩაშლისკენ მოუწოდა.

მოგვიანებით, ტელეკომპანია "იმედთან" საუბრისას, თბილისის სახელმწიფო უნივერსიტეტის ერთ-ერთმა სტუდენტმა უნივერსიტეტში წინასწარ დაგეგმილ პროვოკაციაზე ისაუბრა.

მისი თქმით, „ნაციონალური მოძრაობის“ ახალგაზრდულმა ორგანიზაციამ ირაკლი კობახიძის ლექციის ჩაშლა სცადა, თუმცა იმ სტუდენტებმა, რომლებსაც ლექციაზე დასწრება სურდათ, მათ ამის საშუალება არ მისცეს.

„ჩვენ გვსურდა დავსწრებოდით პრემიერის, ირაკლი კობახიძის ლექციას, თუმცა „ნაცმოძრაობის“ ახალგაზრდული ორგანიზაცია შეეცადა პროვოკაცია მოეწყო და სალექციო პროცესი ჩაეშალა. სტუდენტების მეორე მხარემ, რომლებსაც ლექციაზე დასწრება გვსურდა, მათ ხელი შევუშალეთ. ამას უკვე სისტემატური ხასიათი მიეცა და თითქმის ყოველ შაბათს ცდილობენ, რომ ჩაშალონ სალექციო პროცესი“, - განაცხადა თსუ-ის სტუდენტმა.

ინციდენტის მიუხედავად, თბილისის სახელმწიფო უნივერსიტეტში ირაკლი კობახიძის ლექცია ჩვეულ რეჟიმში ჩატარდა.