ტაივანის თავდაცვის სამინისტრომ შაბათს განაცხადა, რომ ჩინეთმა კუნძულისკენ ათობით თვითმფრინავი და ხომალდი გაგზავნა. ინფორმაციას AP ავრცელებს.

თავდაცვის სამინისტროს განცხადებაში ნათქვამია, რომ 24 საათის განმავლობაში - პარასკევს დილის 6 საათიდან შაბათის დილის 6 საათამდე - სახალხო განმათავისუფლებელი არმიის 32 თვითმფრინავი და საზღვაო ძალების ცხრა გემი აღმოაჩინეს.

მათგან 20-მა თვითმფრინავმა ტაივანის სრუტის მედიანური ხაზი გადაკვეთა ან ტაივანის საჰაერო თავდაცვის საიდენტიფიკაციო ზონა დაარღვია. საპასუხოდ, ტაივანმა მზადყოფნაში მოიყვანა საკუთარი თვითმფრინავები, გემები და სარაკეტო სისტემები.

ცნობისთვის, ჩინეთის ეს ქმედება ბაიდენის ადმინისტრაციის მიერ ტაივანისთვის 500 მილიონი დოლარის იარაღის მიყიდვის გადაწყვეტილებას მოჰყვა. როგორც ცნობილია, აშშ ტაივანს F-16-ის ტიპის მოიერიშე თვითმფრინავების აღჭურვილობასა და სხვა სამხედრო სისტემებს მიჰყიდის.