ტაჯიკეთის საგარეო საქმეთა სამინისტრო უარყოფს მედიაში გავრცელებულ ინფორმაციას, თითქოს „კროკუს სითი ჰოლში“ მომხდარ ტერაქტში ტაჯიკეთის მოქალაქეები მონაწილეობდნენ. მათივე ინფორმაციით, ამის შესახებ რუსული მხარისგან ოფიციალური დადასტურება დუშანბეს არ მიუღია.

მანამდე ერთ-ერთ რუსულ ტელეგრამ-არხზე გავრცელდა ინფორმაცია, რომლის მიხედვითაც, პოლიციამ ორი ტერორისტი ბრიანსკის ოლქში დააკავა.

„ავტომობილი, რომლითაც სავარაუდო ტერორისტები გადაადგილდებოდნენ, ბრიანსკის ოლქში, უკრაინასა და ბელარუსთან საზღვრის მახლობლად გააჩერეს. მანქანაში 6 ადამიანი იყო: ორი მათგანი დაკავებულია, 4-მა კი გაქცევა შეძლო. დაკავებულები ტაჯიკეთის მოქალაქეები არიან. მათთან ამჟამად სპეცსამსახურები მუშაობენ, დარჩენილ 4-ს კი შესაბამისი უწყებები ეძებენ“, - წერს ტელეგრამ-არხი Baza.

მოსკოვის ოლქის ქალაქ კრასნოგორსკში „კროკუს სითი ჰოლის“ საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა - დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა.

არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა. რუსეთის საგამოძიებო კომიტეტის წინასწარი მონაცემებით „კროკუს სითი ჰოლში“ ტერაქტის შედეგად დაღუპულთა რიცხვმა 60-ს გადააჭარბა.

გავრცელებული ინფორმაციით, ტერორისტულ თავდასხმაზე პასუხისმგებლობა დაჯგუფება „ისლამურმა სახელმწიფომ“ აიღო. რაც შეეხება თავდამსხმელებს, საგამოძიებო კომიტეტში აცხადებენ, რომ ამ საკითხზე საუბარი ამ ეტაპზე ნაადრევია.