25 სექტემბერი, 2022

საქართველოს აეროპორტების გაერთიანების დირექტორი, თამარ არჩუაძე აცხადებს, რომ 2023 წელს ქუთაისის აეროპორტი, სავარაუდოდ, მილიონზე მეტ მგზავრს მოემსახურება. ამის შესახებ განცხადება თამარ არჩუაძემ Galt&Taggart-ის მიერ მოწყობილი დისკუსიის დროს - "ტურიზმის სექტორი: გამოწვევები და პერსპექტივები" გააკეთა.

“ქუთაისის აეროპორტი, ასაფრენ-დასაფრენი ზოლის გეგმიური რეაბილიტაციის გამო, 2 კვირის განმავლობაში დაიკეტება. გაზრდილი მოთხოვნის გამო, მიმდინარე წელს ასევე გაფართოვდა და 6-ჯერ გაიზარდა ქუთაისის ტერმინალი. ვფიქრობთ, მომავალ წელს მილიონ მგზავრზე მეტს მოვემსახურებით”, - აცხადებს აეროპორტების გაერთიანების დირექტორი.

2022 წლის იანვარ-აგვისტოში ქუთაისის საერთაშორისო აეროპორტი ჯამში 534 007 მგზავრს მოემსახურა. არსებობის მანძილზე, ყველაზე მეტი მგზავრი ქუთაისის აეროპორტს 2019 წელს ჰყავდა - 873 616-მა მგზავრი. ამ ეტაპზე აეროპორტში 6 ავიაკომპანია - 17 ქვეყნის 28 მიმართულებით ასრულებს ფრენებს.