მანანა დოიჯაშვილის სახელობის კონსერვატორიის სამუსიკო სემინარიის საფორტეპიანო განყოფილების მოსწავლე თამარ ნიშნიანიძე ახალი სასწავლო წლიდან ნიუ-ორკში, ჯულიარდის სკოლაში საფორტეპიანო განყოფილებაზე გააგრძელებს სწავლას.

აღსანიშნავია, რომ თამარ ნიშნიანიძე პირველი ახალგაზრდაა საქართველოდან, რომელმაც 15 წლის ასაკში ჯულიარდის ურთულესი საკონკურსო ტურები გაიარა და საფორტეპიანო განყოფილებაზე სრული დაფინანსებით ჩაირიცხა.

მაღალი აკადემიური მოსწრების გამო, თამარი ასევე 90%-ანი დაფინანსებით ისწავლის ლემან მანჰეტენის კერძო სკოლაში (Léman Manhattan).

შეგახსენებთ, რომ ჯულიარდის სკოლა საშემსრულებლო ხელოვნების კონსერვატორიაა ნიუ-იორკში, რომელიც მისი სახელგანთქმული კურსდამთავრებულების რაოდენობით არის ცნობილი. ჯულიარდი ამერიკის ერთ-ერთი წამყვანი სამუსიკო კონსერვატორია და დრამატული სკოლაა. იგი ამჟამად ლინკოლნის ცენტრში მდებარეობს და მასში მუსიკას, ცეკვის ხელოვნებასა და დრამას 700-მდე საბაკალავრო და მაგისტრანტი სტუდენტი სწავლობს.