თამარ ზაალიშვილმა „TV პირველს“ ცილისწამებისთვის დაწყებული სასამართლო დავა მოუგო
20 სექტემბერი, 2022
„ქართული ოცნების“ თავმჯდომარის, ირაკლი კობახიძის დედამ, ტელეკომპანია „პირველს“ სასამართლოში დავა მოუგო.
თამარ ზაალიშვილის მტკიცებით, რომელიც განათლების ხარისხის ეროვნული ცენტრის დირექტორის ყოფილი მოადგილეა, ცილისმწამებლურია ტელეკომპანიის მიერ გავრცელებული ინფორმაცია, რომ ის ყალბ დიპლომებს საკუთარი ხელმოწერით ადასტურებდა.
მოსარჩელის თქმით, ცრუ ინფორმაციის გავრცელება მისი და თავისი შვილის - ირაკლი კობახიძის რეპუტაციისთვის ზიანის მიყენება იყო.
ზაალიშვილი ტელეკომპანიისგან კომპენსაციის სახით, სიმბოლურად, 5 555 ლარს, პროდიუსერისა და ჟურნალისტისგან (ნოდარ მელაძისგან და მაკა ჩიხლაძისგან) კი 5-5 ლარს ითხოვდა. თბილისის საქალაქო სასამართლომ მისი მოთხოვნა დააკმაყოფილა. ტელეკომპანიას დაევალა, გამოაქვეყნოს და გააშუქოს ინფორმაცია იმის შესახებ, რომ სასამართლოს მიერ ამ ამბის ცილისმწამებლური ნაწილი დადგინდა.
თამარ ზაალიშვილი ასევე უჩიოდა მარინე მიქაუტაძეს, რომელიც თეატრალური უნივერსიტეტის ყოფილი თანამშრომელია და სიუჟეტში რესპონდენტი იყო. სასამართლომ მასაც 5 555 ლარის გადახდა დააკისრა.
