თბილისის სხვადასხვა რაიონში მცხოვრებ დამატებით, 260 ოჯახს საცხოვრებელი ფართები დაუკანონდება, განაცხადა დედაქალაქის მერმა, კახა კალაძემ მუნიციპალიტეტის მთავრობის სხდომაზე.

კალაძემ აღნიშნა, რომ 2017 წელს დაწყებული პროგრამა წარმატებით ხორციელდება. მისი თქმით, პროგრამის ფარგლებში, კერძო საკუთრებაში უკვე რამდენიმე ასეული მილიონის ღირებულების ფართია გადაცემული.

"ძალიან მიხარია, რომ ამდენი ოჯახი გაბედნიერდა და ეს პროგრამა წარმატებით ხორციელდება. გარდა ამისა, დაწყებული გვაქვს კოოპერატიული ბინათმშენებლობებით დაზარალებული ოჯახების საცხოვრებელი ფართებით დაკმაყოფილება. ასევე, დაუმთავრებელი შენობა-ნაგებობების მიმართულებით გვაქვს კონკრეტული გადადგმული ნაბიჯები", - განაცხადა კალაძემ.

პროგრამის ფარგლებში, საცხოვრებელი ფართები დაუკანონდება ნაძალადევის რაიონში მცხოვრებ 25 ოჯახს, ისნის რაიონში – 43 ოჯახს, მთაწმინდის რაიონში – 11 ოჯახს, ვაკის რაიონში – 51-ს, გლდანის რაიონში – 31-ს, კრწანისის რაიონში – 9 ოჯახს, საბურთალოს რაიონში – 19-ს, სამგორის რაიონი კი, 71 ოჯახს.

თბილისის მერმა ანალოგიური პრობლემის მქონე ოჯახებს დაკანონების პროცედურების შესახებ ინფორმაცია კიდევ ერთხელ მიაწოდა და მათ მაქსიმალურ მხარდაჭერას დაპირდა.

კალაძის თქმით, მოქალაქეებმა აუცილებლად უნდა მიმართონ თავიანთი რაიონის გამგეობას, სადაც დეტალურად გააცნობენ საჭირო პროცედურებისა და დოკუმენტების შესახებ ინფორმაციას.