თეირანში „3+3“ ფორმატში შეხვედრის ფარგლებში აზერბაიჯანისა და სომხეთის საგარეო საქმეთა მინისტრებს შორის საუბარი შედგა. ამის შესახებ ირანის საგარეო საქმეთა მინისტრმა ჰოსეინ ამირ აბდოლაჰიანმა თეირანში გამართული „3+3“ ფორმატში საგარეო საქმეთა მინისტრების შეხვედრის შემდეგ განაცხადა.

"თეირანში გამართული „3+3“ შეხვედრის ფარგლებში არარატ მირზოიანისა და ჯეიჰუნ ბაირამოვის შეხვედრა ერთ-ერთი წინ გადადგმული ნაბიჯია აზერბაიჯანსა და სომხეთს შორის მშვიდობისა და მეგობრობის გზაზე. შეხვედრისას აზერბაიჯანისა და სომხეთის საგარეო საქმეთა მინისტრებს საშუალება მიეცათ ესაუბრათ. ეს შეხვედრა ხელს შეუწყობს სტაბილურობისა და უსაფრთხოების დამყარებას სამხრეთ კავკასიაში“, - განაცხადა აბდოლაჰიანმა.

შეგახსენებთ, რომ გუშინ თეირანში საგარეო საქმეთა მინისტრების შეხვედრა „3+3“ ფორმატში გაიმართა და მასში აზერბაიჯანის, რუსეთის, თურქეთის, ირანის და სომხეთის საგარეო საქმეთა მინისტრები მონაწილეობდნენ. საგარეო საქმეთა მინისტრების დონეზე გამართულ შეხვედრაზე პოლიტიკური, ეკონომიკური, უსაფრთხოების, ტრანზიტის, ენერგეტიკის და სხვა მიმართულებით რეგიონული თანამშრომლობის საკითხები განიხილეს.

„3+3“ ფორმატში გამართული შეხვედრის ერთ-ერთ მთავარ მიზანს წარმოადგენდა რეგიონული პრობლემების მოგვარება გარე ქვეყნების გარეშე, მხოლოდ რეგიონის ქვეყნების მონაწილეობით და ასევე, აზერბაიჯანსა და სომხეთს შორის სამშვიდობო მოლაპარაკებების წარმოება.