რუსეთის დელეგაცია თავდაცვის მინისტრის სერგეი შოიგუს ხელმძღვანელობით სამშაბათს თეირანში ჩავიდა. ვიზიტის მიზანი ირანის ისლამური რესპუბლიკის სამხედრო ხელმძღვანელობასთან მოლაპარაკებებია. ამის შესახებ რუსეთის თავდაცვის სამინისტრო იუწყება.

„ვიზიტის ფარგლებში რუსეთის თავდაცვის სამინისტროს დელეგაცია ირანის ისლამური რესპუბლიკის სამხედრო ხელმძღვანელობასთან არაერთ მოლაპარაკებას გამართავს“, - ნათქვამია განცხადებაში.

დეპარტამენტის ცნობით, ეს ვიზიტი ხელს შეუწყობს რუსეთ-ირანის სამხედრო კავშირების განმტკიცებას და გახდება მნიშვნელოვანი ეტაპი ორ ქვეყანას შორის თანამშრომლობის განვითარებაში.

"რუსეთის დელეგაციის დახვედრის ოფიციალური ცერემონია ირანის შეიარაღებული ძალების გენერალური შტაბის მთავარ შენობაში, საპატიო დაცვის ასეულისა და ორკესტრის მონაწილეობით გაიმართა. რუსეთის თავდაცვის მინისტრს ირანის გენერალური შტაბის უფროსი მოჰამედ ბაგერი მიესალმა", - ნათქვამია მოხსენებაში.