აშშ-ის პრეზიდენტმა, ჯო ბაიდენმა და კატარის ემირმა ღაზაში არსებული ვითარება განიხილეს.

როგორც თეთრი სახლის განცხადებაშია აღნიშნული, ჯო ბაიდენი კატარის ემირს, შეიხ ტამიმ ბინ ჰამად ალ თანის ესაუბრა ღაზაში განვითარებულ მოვლენებზე და მცდელობებზე, „ჰამასის“ მიერ დატყვევებული მძევლების გათავისუფლება უზრუნველყონ.

„ბაიდენმა დაგმო „ჰამასის“ მიერ მძევლების დაკავება, მათ შორის მცირეწლოვნებისაც, რომელთა შორის ერთ-ერთი აშშ-ის მოქალაქე სამი წლის ბავშვია, რომლის მშობლებიც 7 ოქტომბერს დახოცეს. ორი ლიდერი შეთანხმდა, რომ ყველა მძევალი ყოველგვარი შეფერხების გარეშე უნდა გაათავისუფლონ“, – ნათქვამია თეთრი სახლის განცხადებაში.

როგორც „როიტერი“ წერს, თეთრი სახლის განცხადებაში ცეცხლის შეწყვეტის შესახებ რაიმე ტიპის განხილვა არ არის ნახსენები და ნათქვამია, რომ ლიდერებმა „უდანაშაულო მშვიდობიანი მოსახლეობის დაცვის აუცილებლობასა და ღაზაში ჰუმანიტარული დახმარების გაზრდის მცდელობებზე” ისაუბრეს.

განცხადებაში აღნიშნულია, რომ ლიდერები შეთანხმდნენ, გააგრძელონ ძალისხმევა, რათა უფრო მშვიდობიანი, უსაფრთხო, აყვავებული და სტაბილური ახლო აღმოსავლეთის რეგიონი შექმნან.