თეთრმა სახლმა ადვოკატების, კანონმდებლებისა და კომუნიკაციის სპეციალისტების გუნდი მოიწვია, რათა პასუხი გასცეს პრეზიდენტ ჯო ბაიდენის წინააღმდეგ სავარაუდო იმპიჩმენტის საკითხის დაყენებას. ინფორმაციას „ენბისი ნიუსი“ ავრცელებს.

როგორც „ენბისი ნიუსი“ წერს, ბაიდენის თანაშემწეები და მოკავშირეები აცხადებენ, რომ ენერგიულად ემზადებიან იმპიჩმენტის საკითხზე წინააღმდეგობის გასაწევად.

„თანამედროვე ისტორიაში არასოდეს მომხდარა იმპიჩმენტი, რომელიც მტკიცებულებებს არ ეფუძნება“, – აცხადებენ თეთრ სახლში.

„სიენენის" მიერ რამდენიმე დღის წინ გავრცელებული ინფორმაციის თანახმად, აშშ-ის კონგრესის წარმომადგენელთა პალატის სპიკერმა, კევინ მაკარტიმ და რესპუბლიკური პარტიის წარმომადგენლებმა ჯო ბაიდენის იმპიჩმენტის სტრატეგიის შემუშავება დაიწყეს. როგორც „სიენენი“ წერს, იმპიჩმენტის პროცედურა მოსამზადებელი დოკუმენტების შემუშავების შემდეგ, ოქტომბრის შუა რიცხვებში დაიწყება. იმპიჩმენტის პროცედურა იმ შემთხვევაში დაიწყება, თუ ბაიდენის ადმინისტრაცია კომისიას არ მიაწვდის ინფორმაციას, რომელიც ბაიდენის შვილის, ჰანტერ ბაიდენის საქმეზე აწარმოებს გამოძიებას.