უკრაინისთვის გამოყოფილი ამერიკული სამხედრო დახმარების დაახლოებით 90% აშშ-ში რჩება. ამის შესახებ The Washington Post-ი წერს.

გამოცემის ცნობით, თანხის უდიდესი ნაწილი ახალი შეიარაღების წარმოებისთვის ან ამერიკული მარაგებიდან უკრაინაში გაგზავნილი შეიარაღების ჩასანაცვლებლად იხარჯება.

კერძოდ, უკრაინისთვის შეიარაღების წარმოება 31 შტატის 71 ქალაქში, 117 საწარმოო ხაზზე მიმდინარეობს.

ამასთანავე, გამოცემა აღნიშნავს, რომ 31 კონგრესმენი, რომელთა შტატებიც ან ოლქებიც ამ თანხებს იღებენ, უკრაინისთვის დახმარების შეზღუდვას ან შეწყვეტას უჭერს მხარს.

„მაშინ როდესაც რესპუბლიკელები და დემოკრატები ერთმანეთს ელექტორატის ხმებისთვის ებრძვიან და აშშ-ის საწარმოო ბაზის გაძლიერებაზე საუბრობენ, უკრაინისთვის დახმარების გამოყოფით სწორედ ეს კეთდება - ქარხნებში ფინანსური ნაკადები მიდის, რასაც ამერიკელებისთვის პირდაპირი სარგებელი მოაქვს - იქმნება სამუშაო ადგილები და ა.შ.“ - აღნიშნულია სტატიაში.