თორნიკე რიჟვაძე - ბათუმის ხელოვნური კუნძულის მშენებლობა დაიწყო, რომელიც იქნება მსოფლიო კლასის ახალი ტურისტული მიმართულება
3 სექტემბერი, 2022
ბათუმში უმსხვილესი საინვესტიციო პროექტის, ხელოვნური კუნძულის მშენებლობა დაიწყო, რომელიც ულტრათანამედროვე გასართობ-გამაჯანსაღებელი ტიპის ორი ხელოვნური ნახევარკუნძულის და ერთი კუნძულის შექმნასა და მათზე ინფრასტრუქტურის მოწყობას მოიცავს.
„ამბასადორი ბათუმი აილენდის“ მშენებლობის კაფსულის ჩაგდების ცერემონიაზე აჭარის მთავრობის თავმჯდომარემ პროექტის მნიშვნელობაზე ისაუბრა და აღნიშნა, რომ პროექტი თავისი მასშტაბებით საერთაშორისო მსოფლიო კლასის ახალ ტურისტულ მიმართულებას წარმოადგენს.
„დღეს ჩვენ ყველა ერთად ვიწყებთ რეგიონისთვის და შეიძლება ითქვას, მთელი ქვეყნისთვის ერთ-ერთი ყველაზე მნიშვნელოვანი ტურისტული და ინფრასტრუქტურული პროექტის მშენებლობას. პროექტის, რომელიც როგორც რეგიონის, ასევე ქვეყნის ტურიზმის განვითარებას ახალ ეტაპზე გადაიყვანს. დღიდან პროექტის დაანონსებისა, ბევრს არ სჯეროდა, ბევრი სკეპტიციზმი მოვისმინეთ, თუმცა, გათვალისწინებით საერთაშორისო კომპანიებისა, გათვალისწინებით იმ ძალიან დიდი ნდობის და პროექტის მიმართ თავდადების, რასაც ჩვენ ვხედავთ ინვესტორის მხრიდან, ეს პროექტი აუცილებლად წარმატებით დასრულდება და თავის სიტყვას იტყვის როგორც ჩვენი რეგიონის, ასევე ჩვენი ქვეყნის განვითარებაში. ეს არის პროექტი, რომელიც თავისი მასშტაბებით წარმოადგენს საერთაშორისო მსოფლიო კლასის ახალ ტურისტულ მიმართულებას. დარწმუნებული ვარ, რომ ამ პროექტის მიმდინარეობისას, როგორც რეგიონში, ასევე მთელ მსოფლიოში არაერთხელ ისაუბრებენ როგორც ამ პროექტზე და ამ პროექტიდან გამომდინარე, ჩვენს ქალაქზე, ჩვენს რეგიონზე და ჩვენს ქვეყანაზე და ისაუბრებენ ძალიან კარგად“, - განაცხადა თორნიკე რიჟვაძემ.
ამასთან, აჭარის მთავრობის თავმჯდომარემ ისაუბრა ტურიზმთან დაკავშირებით და აღნიშნა, რომ წელს აჭარაში ტურიზმის აღდგენის მიმართულებით ისტორიული მაჩვენებელი დაფიქსირდა.
„წელს ჩვენ გვქონდა რეკორდული წელი, შეიძლება ითქვას, ისტორიული მაჩვენებელი ტურიზმის აღდგენის მიმართულებით და ამ დადებით ტენდენციას სჭირდება გაგრძელება, კიდე უფრო მეტი ამბიცია, კიდე უფრო მეტი შრომა, და ჩვენ ყველანი მზად ვართ, რომ ყოველდღიურად ვიშრომოთ ამ ძალიან დიდი სამეწარმეო მუხტის მატარებელ ხალხთან ერთად, რომ ახალი პროექტები შევქმნათ.
განსაკუთრებით გამოვარჩევდი ამ პროექტის მნიშვნელობას ჩვენი ბათუმისთვის და ბათუმელებისთვის. ეს ახალი პროექტი შექმნის 2000 ახალ სამუშაო ადგილს და სტაბილურ შემოსავალს შეუქმნის ძალიან ბევრ ოჯახს ბათუმში. ჩვენი მთავარი ამოცანა, ეკონომიკის განვითარების, ეკონომიკის ორნიშნა ზრდას წარმოადგენს, რომ თითოეული მოქალაქე იყოს ამ პროცესში ჩართული. და ჩვენი გუნდი, მთელი ხელისუფლება ყველაფერს გააკეთებს, რომ არცერთი მოქალაქე არ დარჩეს ამ პროცესის მიღმა. მინდა გითხრათ, რომ ჩვენ ამით არ გავჩერდებით. არაერთ მნიშვნელოვან ინიციატივას ვგეგმავთ ცენტრალურ ხელისუფლებასთან ერთად. ბათუმი, უკვე მეორედ წარდგენილია პრესტიჟულ ე.წ. „ტურიზმის ოსკარზე“, რომლის შედეგებსაც ჩვენ პირველ ოქტომბერს გავიგებთ. დარწმუნებული ვარ, ჩვენ კიდევ ბევრ გამარჯვებას ვიზეიმებთ”, - განაცხადა აჭარის მთავრობის მეთაურმა.
აჭარის მთავრობის ინფორმაციით, უმსხვილესი საინვესტიციო პროექტი, "ამბასადორი ბათუმი აილენდი" ულტრათანამედროვე გასართობ-გამაჯანსაღებელი ტიპის ორი ხელოვნური ნახევარკუნძულის და ერთი კუნძულის შექმნასა და მათზე ინფრასტრუქტურის მოწყობას მოიცავს. პროექტის ფარგლებში თანამედროვე სტანდარტების, კომერციული, გასართობი, სპორტული, საგანმანათლებლო, გამაჯანსაღებელ-სამკურნალო, საცხოვრებელი და ტურისტულ-რეკრეაციული ინფრასტრუქტურა აშენდება. პროექტი მთლიანად კერძო ინვესტიციით ხორციელდება. „ამბასადორი ჯგუფი" პროექტის პირველი ფაზის განსახორციელებლად 100 მილიონი დოლარის ინვესტიციას ჩადებს. მშენებლობაზე 2000 ადამიანი დასაქმდება.
