თურქეთი თვლის, რომ რეგიონში ურთიერთობების მოწესრიგება და კეთილმეზობლური განწყობის მიღწევა სრულიად შესაძლებელია. პრაღაში, ევროპული პოლიტიკური გაერთიანების სამიტზე, თურქეთის პრეზიდენტი, რეჯეფ თაიფ ერდოღანი სომხეთის პრემიერ-მინისტრს, ნიკოლ ფაშინიანს შეხვდა. შეხვედრაზე ლიდერებმა სომხეთ-თურქეთის ურთიერთობების ნორმალიზების პროცესი და ამ მიმართულებით შესაძლო ნაბიჯები განიხილეს.

"შეხვედრაზე იყო გარკვეული მოთხოვნები, რომლებიც გადავეცით ჩვენს სპეციალურ წარმომადგენლებსა და მინისტრებს. მოლაპარაკებების შემდეგ, ჩვენ საჭირო ნაბიჯებს გადავდგამთ“, - აღნიშნა ერდოღანმა.

თურქეთის პრეზიდენტმა მომავალში არც სირიის პრეზიდენტ, ბაშარ ასადთან შეხვედრა გამორიცხა.

"ასადთან შეხვედრა ჯერჯერობით გამორიცხულია. მაგრამ, როცა დრო მოვა, შესაძლოა სირიის პრეზიდენტსაც შევხვდეთ... ამჟამად, შეხვედრები მხოლოდ ქვედა დონეზე მიმდინარეობს", - უპასუხა ერდოღანმა შეკითხვას შეხვდებოდა თუ არა სირიის პრეზიდენტს მშვიდობისათვის.