პრეზიდენტი რეჯეფ თაიფ ერდოღანი მომავალ კვირას რუსეთში გაემგზავრება და პრეზიდენტ ვლადიმერ პუტინს შეხვდება, რაც შეიძლება რუსეთის შავი ზღვის მარცვლეულის შეთანხმებაში დაბრუნების კუთხით წინ გადადგმული ნაბიჯი იყოს, - ამის შესახებ თურქეთის მმართველი „სამართლიანობისა და განვითარების პარტიის“ სპიკერმა, ომერ ჩელიკმა განაცხადა.

„პრეზიდენტი ერდოღანი აქამდე აქტიურ დიპლომატიას მიმართავდა, რათა გლობალური სასურსათო კრიზისის თავიდან აცილებისთვის შეეწყო ხელი“, - განუცხადა ჩელიკმა ჟურნალისტებს.

მისივე თქმით, შეხვედრა სოჭში გაიმართება.

მანამდე ვლადიმერ პუტინმა ერდოღანთან სატელეფონო საუბრისას აღნიშნა, რომ მოსკოვი მზად არის, დაუბრუნდეს შავი ზღვის მარცვლეულის შეთანხმებას, როგორც კი დასავლეთი შეასრულებს თავის ვალდებულებებს რუსული მარცვლეულის ექსპორტთან დაკავშირებით.