თურქეთის შინაგან საქმეთა სამინისტრომ ანკარაში მომხდარი აფეთქების შემსრულებლების ვინაობა დაადგინა. ინფორმაციას ადგილობრივი მედია ავრცელებს.

სამინისტროს ინფორმაციით, პარლამენტისა და შსს-ს შენობებთან ტერორისტული აფეთქება ოზკან შაჰინმა და ჰასან ოღუზმა განახორციელეს, რომლებიც „ქურთისტანის მუშათა პარტიის“ წევრები იყვნენ.

მედიაში გავრცელებული ინფორმაციით, თავდამსხმელების ვინაობის დასადგენად დნმ-ის ანალიზი გახდა საჭირო, რადგან ერთ-ერთმა პირმა შენობის შესასვლელთან თავი აიფეთქა.

შეგახსენებთ, რომ ანკარაში, თურქეთის პარლამენტისა და შინაგან საქმეთა სამინისტროს შენობებთან აფეთქება პირველ ოქტომბერს მოხდა.