თურქული მედია - თურქეთმა ეგეოსის ზღვის დემილიტარიზებული სტატუსის მქონე კუნძულებზე საბერძნეთის მხრიდან იარაღის შეტანის ამსახველი ფოტოები გადაიღო
25 სექტემბერი, 2022
თურქეთმა ეგეოსის ზღვის დემილიტარიზებული სტატუსის მქონე კუნძულებზე საბერძნეთის მხრიდან იარაღის შეტანის ამსახველი ფოტოები გამოაქვეყნა. ფოტოებს თურქული სახელმწიფო სააგენტო „ანადოლუ“ აქვეყნებს.
როგორც სააგენტო წერს, თურქეთის თავდაცვის დრონებმა ბერძნული ხომალდების ამსახველი ფოტოები გადაიღეს. მათი მეშვეობით კი, 18 და 21 სექტემბერს, დემილიტარიზებული სტატუსის მქონე კუნძულებზე - ლესბოსსა და სამოსზე, 23 ტაქტიკური ჯავშანტრანსპორტი იქნა გადატანილი.
თურქეთის უსაფრთხოების სამსახურების განცხადებით, ათენის მხრიდან 18 და 21 სექტემბერს განხორციელებული ქმედებები წარმოადგენს თურქეთთან ახლოს მდებარე კუნძულების მილიტარიზაციის მტკიცებულებას და შესაბამისად, ამ კუნძულების დემილიტარიზებული სტატუსის დარღვევას.
უსაფრთხოების სამსახურის ცნობით, დიალოგის გამართვისა და კეთილმეზობლური ურთიერთობების ჩამოყალიბების შესახებ მოწოდების მიუხედავად, ათენი საერთაშორისო სამართლის და ალიანსის სულისკვეთების საპირისპიროდ მოქმედებს, რაც მიუღებელია.
სექტემბრის დასაწყისში, თურქეთის პრეზიდენტმა რეჯეფ თაიფ ერდოღანმა ათენი ეგეოსის ზღვის დემილიტარიზებული კუნძულების ოკუპაციასა და შეიარაღებაში დაადანაშაულა და განაცხადა, რომ როდესაც დადგება დრო, თურქეთი გააკეთებს ყველაფერს, რაც საჭიროა.
