უკრაინაში დაღუპული ქართველი მებრძოლი გელა გოგია სამშობლოში ჩამოასვენეს. სამოქალაქო პანაშვიდი ქაშვეთის ეკლესიაში მიმდინარეობს
3 სექტემბერი, 2022
უკრაინაში დაღუპული ქართველი მებრძოლი გელა გოგია სამშობლოში გამთენიისას ჩამოასვენეს. ქართველი მებრძოლის ცხედარს ოჯახის წევრებმა, ახლობლებმა და თბილისის საერთაშორისო აეროპორტში შეკრებილმა მოქალაქეებმა პატივი მიაგეს.
ქაშვეთის ეკლესიაში სამოქალაქო პანაშვიდი 13.00 საათამდე გაგრძელდება, შემდეგ კი, გელა გოგიას სენაკში გადაასვენებენ. მას 6 სექტემბერს, საგვარეულო სასაფლაოზე, სამხედრო პატივით დაკრძალავენ.
გელა გოგია ქალაქ კრამატორსკში იბრძოდა. როგორც მისი ახლობლები ყვებიან, ის და მისი თანამებრძოლები 26 აგვისტოს სარაკეტო დარტყმების ქვეშ მოყვნენ. მიღებული ჭრილობებისგან გელა გოგია გარდაიცვალა, რამდენიმე მებრძოლი კი, დაშავდა.
გელა გოგია აფხაზეთის ომის მონაწილე იყო. ბოლო წლები, ის უკრაინაში ცხოვრობდა და პირველივე დღიდან იბრძოდა.
24 თებერვლის შემდეგ, უკრაინაში მიმდინარე ომში 19 ქართველი მებრძოლი დაიღუპა.
