„მარცვლეულის ინიციატივის“ ფარგლებში, უკრაინიდან სასოფლო-სამეურნეო პროდუქციის ექსპორტმა ორ თვეში 5,5 მლნ ტონას მიაღწია. ამის შესახებ, ქვეყნის ინფრასტრუქტურის სამინისტროს მიერ Facebook-ზე გამოქვეყნებულ ინფორმაციაშია ნათქვამი.

სამინისტროს ცნობით, სექტემბრის ექსპორტის მაჩვენებელი - 3,8 მლნ ტონა, აგვისტოს - 1,7 მლნ ტონა მოცულობას ორჯერ აღემატებოდა. მთლიანობაში, „მარცვლეულის ინიციატივის“ ფარგლებში, ოდესის, ჩერნომორსკისა და პივდენის პორტებიდან აგვისტო-სექტემბერში 241 გემი გაიგზავნა, მათ შორის - 176 სექტემბერში, ხოლო - 65 გემი აგვისტოში გავიდა.

ოდესის პორტიდან 74 გემმა - 1,5 მლნ ტონა მარცვლეული გაიტანა, ჩერნომორსკის პორტი 111 გემმა - 2,1 მლნ ტონა მოცულობით დატოვა, ხოლო პივდენის პორტიდან 56 გემმა - 1,9 მლნ ტონა მარცვლეული გაიტანა.

სამინისტროს ცნობით, გაეროს მსოფლიო სასურსათო პროგრამასთან თანამშრომლობით, 4 გემი - 120 000 ტონაზე მეტი ხორბლით ეთიოპიაში, იემენში და ავღანეთში უკვე გაემგზავრა, ხოლო უახლოეს მომავალში მეხუთე გემი ჩერნომორსკის პორტში სომალისთვის - 30 000 ტონა ხორბლის ჩასატვირთად შევა.

სულ აფრიკის კონტინენტის ქვეყნებში 33 გემით - 0,83 მლნ ტონა პროდუქცია გაიგზავნა, მათ შორის ეგვიპტეში 17 გემით - 383,5 ათასი ტონა, ტუნისში 4 გემით - 86 ათასი ტონა და ლიბიაშიც 4 გემით - 78,9 ათასი ტონა. აზიის ქვეყნებში 113 გემით - 2,08 მლნ ტონა, ხოლო ევროპის ქვეყნებში 95 გემით - 2,59 მლნ ტონა მარცვლეული გაიგზავნა.

ინფრასტრუქტურის სამინისტრო წერს, რომ უკრაინიდან ექსპორტირებული სიმინდის 58% ევროპაში, ხოლო ექსპორტირებული ხორბლის 68% აფრიკასა და აზიაში გავიდა.

მოამზადა ლადო სულაბერიძემ