უკრაინის არმია შეტევებს აგრძელებს და სამხედრო ძალებმა კიდევ რამდენიმე ოლქში არსებული დასახლებული პუნქტი გაათავისუფლეს - ამის შესახებ განცხადება ქვეყნის პრეზიდენტმა ვოლოდიმირ ზელენსკიმ გაავრცელა.

მიუხედავად ამისა, უკრაინის პრეზიდენტი არ აკონკრეტებს თუ რომელ დასახლებულ ტერიტორიებზეა საუბარი. ვოლოდიმირ ზელენსკიმ ვიდეო-მიმართვისას აღნიშნა,რომ ამ დროისთვის საბრძოლო მოქმედებები რამდენიმე მონაკვეთზე მიმდინარეობს.

„ჩვენ უკვე გავათავისუფლეთ რამდენიმე სოფელი. მიუხედავად ამისა, სასტიკი ბრძოლები ფრონტის ბევრ მონაკვეთზე გრძელდება. კიდევ უფრო მეტი ოკუპანტი ცდილობს გაქცევას და მტრის არმიის დანაკარგი დღითიდღე იზრდება. ისინი ხვდებიან, რომ უკრაინასთან ომის წამოწყებით უდიდესი შეცდომა დაუშვეს“, - განაცხადა ზელენსკიმ.

უკრაინის თავდაცვის სამინისტრო ადასტურებს ინფორმაციას, რომ უკრაინის მოიერიშე ძალებმა ხერსონისა და დონეცკის ოლქებში მდებარე რამდენიმე სოფელი გაათავისუფლეს. ამასთან, მათ კონტრშეტევა წამოიწყეს ლუგანსკის ოლქის ქალაქ კრემინას მიმართულებით.