მედიის ცნობით, დონეცკის, ლუგანკსის, ხერსონისა და ზაპოროჟიეს ოლქებში რუსეთთან შეერთების შესახებ ე.წ რეფერენდუმი დღეს იწყება
23 სექტემბერი, 2022
რუსეთის მიერ ოკუპირებულ უკრაინის ოთხ რეგიონში – დონეცკის, ლუგანკსის, ხერსონისა და ზაპოროჟიეს ოლქებში რუსეთთან შეერთების შესახებ ე.წ. რეფერენდუმი დღეს იწყება, – ინფორმაციას სააგენტო „როიტერი“ ავრცელებს.
მათივე ცნობით, ე.წ. დონეცკისა და ლუგანსკის სახალხო რესპუბლიკებში მოსახლეობას „რეფერენდუმის“ მხოლოდ ერთ კითხვაზე მოუწევთ პასუხის გაცემა: „უჭერთ თუ არა მხარს რესპუბლიკის შესვლას რუსეთში ფედერაციაში სუბიექტის სახით?“
ხერსონსა და ზაპოროჟიეში კი, ე.წ. რეფერენდუმზე სამი შეკითხვა იქნება გატანილი: „გსურთ თუ არა, უკრაინისგან გამოყოფა, დამოუკიდებელი სახელმწიფოების შექმნა და რუსეთთან შეერთება?“
უკრაინის ტერიტორიებზე „რეფერენდუმი“ 27 სექტემბრამდე გაგრძელდება. რუსეთის მიერ დაგეგმილ ე.წ რეფერენდუმების გამო, ევროკავშირმა, შესაძლოა, მოსკოვს დაწესებული სანქციები გაუფართოოს. უკრაინის ტერიტორიაზე რუსეთის მიერ „რეფერენდუმების“ ჩატარებას ამერიკის შეერთებული შტატები, ნატო და ეუთო გმობენ.
