უნგრეთის მთავრობამ დაადასტურა მზადყოფნა, 16 სექტემბრიდან დაკეტოს საზღვარი უკრაინის სოფლის მეურნეობის პროდუქციისთვის, თუ ევროკავშირი არ დათანხმდება უკრაინული მარცვლეულის შიდა გაყიდვის აკრძალვას, – ამის შესახებ უნგრეთის სოფლის მეურნეობის მინისტრმა, იშტვან ნაგიმ განაცხადა.

მისი თქმით, თუ ევროკავშირი არ გაახანგრძლივებს უკრაინული მარცვლეულის იმპორტის აკრძალვას, რომელიც 15 სექტემბერს სრულდება, უნგრეთი არა მხოლოდ ჩაკეტავს საზღვრებს უკრაინული ხორბლის, სიმინდის, რაფსის და მზესუმზირის თესლებისთვის, არამედ სიას 24 დასახელების პროდუქტზე გააფართოვებს.

უნგრეთის სოფლის მეურნეობის მინისტრი ამას შიდა ბაზრის დაცვით ხსნის.

იშტვან ნაგი შეშფოთებულია იმ ფაქტით, რომ უნგრეთის სოფლის მეურნეობა ბოლო წლებში "ერთ შოკს მეორის მიყოლებით" განიცდის. მისი თქმით, უნგრელი ფერმერებისთვის სირთულეებს ქმნის "კორონავირუსის ეპიდემია, გვალვა, სამეზობლოში გამძვინვარებული ომი და მისი შედეგები, ენერგოკრიზისი და ის ფაქტი, რომ დაბალფასიანმა უკრაინულმა სოფლის მეურნეობის პროდუქციამ შეავსო ევროპის ბაზარი".

"მიუხედავად იმისა, რომ წელს უკეთესი მოსავალია - ვვარაუდობთ, რომ წლევანდელი სიმინდის მოსავალი თითქმის რეკორდულ დონეს მიაღწევს - იაფი კონკურენცია გაყიდვას ართულებს", - დასძინა ნაგიმ.

მაისში, ევროკავშირმა ნება დართო ბულგარეთს, პოლონეთს, რუმინეთს, სლოვაკეთსა და უნგრეთს, აეკრძალათ უკრაინული ხორბლის, სიმინდის, რაფსის და მზესუმზირის თესლის შიდა გაყიდვა და დაეშვათ საქონლის ტრანზიტი სხვა ქვეყნებში ექსპორტისთვის. ეს აკრძალვა 15 სექტემბერს იწურება.