უნგრეთის პრემიერ-მინისტრის ოფისში აცხადებენ, რომ სანქციები ევროკავშირისთვის "თვითდაზიანების საშუალებას" წარმოადგენს
11 სექტემბერი, 2022
"რუსეთის წინააღმდეგ დაწესებული სანქციები "თვითდაზიანების საშუალება" გახდა ევროპისთვის. მათი გავლენა თითოეულმა ევროპელმა იგრძნო, ამიტომ სანქციების პოლიტიკა უნდა შეიცვალოს", - განაცხადა უნგრეთის პრემიერ-მინისტრის ოფისის საპარლამენტო მდივანმა, ჩაბა დომოტორმა.
"ევროკავშირის სანქციები მათი თავდაპირველი მიზნების შესრულებას ვერ ეხმარება, ხოლო ევროპას - ზიანს აყენებს. ევროპაში არ არსებობს ადამიანი, ვინც ამა თუ იმ ფორმით არ იგრძნო არასწორი სანქციების პოლიტიკის შედეგად გამოწვეული ინფლაცია - კომუნალური გადასახადებით დაწყებული, ტრანსპორტითა და სოფლის მეურნეობით დამთავრებული... სანქციებთან დაკავშირებით ბრუსელში განაცხადეს, რომ ის "სასწაულმოქმედი იარაღი" იქნებოდა, თუმცა, სინამდვილეში, მხოლოდ ეკონომიკური თვითდაზიანების უსარგებლო საშუალება აღმოჩნდა, ამიტომ, ის უნდა შეიცვალოს", - განაცხადა ჩაბა დომოტორმა.
მისივე თქმით, ფასების „ყველაზე დიდი და ხანგრძლივი“ მატება დაიწყო არა რუსეთ-უკრაინის შეიარაღებული კონფლიქტის დაწყების, არამედ „ენერგეტიკის სექტორში სანქციების მიღების" შემდეგ.
მანამდე უნგრეთის პრემიერ-მინისტრმა, ვიქტორ ორბანმა განაცხადა, რომ რუსეთის ფედერაციის წინააღმდეგ 11 ათასი სანქციაა დაწესებული, თუმცა, ისინი წარმატებულნი არ გამოდგნენ, ხოლო, მათგან გამოწვეული ინფლაცია და ენერგოდეფიციტი ევროპას შეიძლება ძალიან მძიმე ტვირთად დააწვეს. მისივე თქმით, ევროპამ უნდა გადახედოს სანქციების პოლიტიკას, ვინაიდან, სხვა შემთხვევაში ძალიან რთულ ვითარებაში აღმოჩნდება.
