თბილისის მერიის გარემოს დაცვის საქალაქო სამსახურის უფროსმა, გიგა გიგაშვილმა თანამდებობა დატოვა. ამის შესახებ გიგაშვილმა ჟურნალისტებს თავად აცნობა.

როგორც მან აღნიშნა, გადაწყვეტილება ვაკის პარკში მომხდარ ტრაგედიას უკავშირდება.

„მე, როგორც გარემოს დაცვის საქალაქო სამსახურის უფროსი, ვგრძნობ მორალურ პასუხისმგებლობას ჩემი მოადგილის სამსახურებრივ ქმედებებზე. მივიჩნევ, რომ საჭიროა, დავტოვო დაკავებული თანამდებობა. სრულად ვითანამშრომლებ გამოძიებასთან, რათა დადგინდეს სიმართლე, რეალურად რა მოხდა ტრაგედიის დღეს და საზოგადოებაში არსებულ ყველა კითხვას გაეცეს პასუხი“, – განაცხადა გიგაშვილმა.

გიგა გიგაშვილი თბილისის მუნიციპალიტეტის მერიის გარემოს დაცვის საქალაქო სამსახურს 2017 წლიდან ხელმძღვანელობს.

გიგა გიგაშვილი ვაკის პარკში მომხდარ ტრაგიკულ შემთხვევასთან დაკავშირებით პოლიციაში რამდენჯერმე დაიკითხა. ამასთან, გუშინ შინაგან საქმეთა სამინისტრომ მისი მოადგილე დააკავა.

13 ოქტომბერს ვაკის პარკში თამაშისას ბავშვებს ბურთი შადრევანში ჩაუვარდათ, მისი ამოღების დროს, სამ არასრულწლოვანს დენმა დაარტყა. ორი მათგანი ხეჩინაშვილის, ერთი კი, იაშვილის კლინიკაში გადაიყვანეს. ერთ-ერთი არასრულწლოვანი კლინიკაში გარდაიცვალა.

მომხდართან დაკავშირებით, 9 პირი დააკავეს, მათ შორის არის თბილისის მერიის გარემოს დაცვის სამსახურის უფროსის მოადგილე და "გრინსერვის პლიუსის" დირექტორი ლაშა ფურცხვანიძე.