ვლადიმერ პუტინი - ყურადღებას გავამახვილებ, რომ ჩვენ მხოლოდ რუსეთის არმიის ნაწილით, საკონტრაქტო ნაწილით ვიბრძვით
16 სექტემბერი, 2022
ვნახოთ, როგორ განხორციელდება და რით დამთავრდება უკრაინის კონტრშეტევითი ოპერაცია, – ამის შესახებ რუსეთის პრეზიდენტმა ვლადიმერ პუტინმა უზბეკეთის ქალაქ სამარყანდში შანხაის თანამშრომლობის ორგანიზაციის სამიტის დასრულების შემდეგ გამართულ პრესკონფერენციაზე განაცხადა.
„კიევის ხელისუფლებამ უკვე გამოაცხადა, რომ მათ დაიწყეს და ატარებენ აქტიურ კონტრშეტევით ოპერაციას. ვნახოთ, როგორ განვითარდება და რით დასრულდება ის“, – აღნიშნა პუტინმა.
ამასთან, რუსეთის პრეზიდენტმა უკრაინაში ე.წ. სპეციალური სამხედრო ოპერაციის მიზნად „დონბასის მთელი ტერიტორიის გათავისუფლება“ დაასახელა.
„ეს სამუშაო გრძელდება, უკრაინის არმიის კონტრშეტევის ყველა მცდელობის მიუხედავად. ჩვენი შეტევითი ოპერაციები დონბასში არ წყდება, ისინი მიმდინარეობს. მიმდინარეობს არა დიდი ტემპით, თუმცა თანმიმდევრულად, ეტაპობრივად რუსული არმია იკავებს ახალ-ახალ ტერიტორიებს. მე ყურადღებას გავამახვილებ, რომ ჩვენ ხომ არასრული არმიით ვიბრძვით, ჩვენ მხოლოდ რუსეთის არმიის ნაწილით, საკონტრაქტო ნაწილით ვიბრძვით“, – აღნიშნა პუტინმა.
მიმდინარე თვის დასაწყისიდან უკრაინა ქვეყნის სამხრეთ-აღმოსავლეთ ნაწილში წარმატებულ კონტრშეტევას ახორციელებს, რის შედეგადაც რუსული ოკუპაციისგან გათავისუფლდა უკრაინის ტერიტორიის რამდენიმე ათასი კვადრატული კილომეტრი და ათობით დასახლებული პუნქტი, მათ შორის ქალაქი იზიუმი ხარკოვის ოლქში.
ავტორი - ქეთი ჩოხელი
