რუსეთის პრეზიდენტი ვლადიმერ პუტინი აცხადებს, რომ აშშ ავიამზიდების ჯგუფის გაგზავნით ახლო აღმოსავლეთში ცეცხლზე ნავთს ასხამს. ამის შესახებ "როიტერი" წერს.

პუტინის თქმით, საჭიროა კომპრომისული გადაწყვეტილებები და იმედი აქვს, რომ საღი აზრი გაიმარჯვებს.

როგორც მედია წერს, რუსეთის პრეზიდენტმა ისრაელსა და პალესტინელებს შორის დაპირისპირებას ახლო აღმოსავლეთში აშშ-ის პოლიტიკის წარუმატებლობის ნათელი მაგალითი უწოდა.

„არ მესმის, რატომ გადაჰყავს აშშ-ს ავიამზიდების ჯგუფი ხმელთაშუა ზღვაში?! მე ნამდვილად არ მესმის აზრი. ლიბანის დაბომბვას აპირებენ თუ რა მიზანი აქვთ? ანუ, ვინმეს შეშინება გადაწყვიტეს? არიან ადამიანები, რომლებსაც არაფრის აღარ ეშინიათ, ეს პრობლემის გადაჭრის გზა არ არის, კომპრომისული გადაწყვეტილებები უნდა ვეძებოთ. რა თქმა უნდა, ასეთი ქმედებები კიდევ უფრო ძაბავს სიტუაციას“, – განაცხადა პუტინმა.