ვოლოდიმირ ზელენსკი - ეს ძალიან რთული ომია, მაგრამ ჩვენ დავიბრუნებთ ჩვენს ტერიტორიას - მინდა, რომ მტერმა ჩვენგან სიურპრიზები მიიღოს
6 სეტემბერი, 2022
ეს ძალიან რთული ომია. ჩვენ დავიბრუნებთ ჩვენს ტერიტორიას, - ამის შესახებ უკრაინის პრეზიდენტმა, ვოლოდიმირ ზელენსკიმ ABC-სთან ინტერვიუში განაცხადა.
მისი თქმით, უკრაინელებმა ოკუპირებული ტერიტორიის ეტაპობრივი დეოკუპაცია უნდა განახორციელონ.
„ეს ამოცანა რთულია და მხოლოდ ჩვენზე არ არის დამოკიდებული, მაგრამ დარწმუნებული ვარ, ასეც მოხდება, მხოლოდ დროის საკითხია“, - აღნიშნა ზელენსკიმ.
კითხვაზე, თუ რატომ გადაწყვიტეს უკრაინელმა სამხედროებმა ხერსონის ოლქში კონტრშეტევის დაწყება, ზელენსკიმ უპასუხა: „არ ვიტყვი, რომ ეს არის მხოლოდ კონტრშეტევა ხერსონში. არის მიმართულება ან მიმართულებები - მრავლობით რიცხვში და ჩვენ წინ უნდა წავიდეთ“.
ამასთან, მან არ ისურვა დეტალებზე საუბარი, როდესაც ჟურნალისტმა სთხოვა დაზუსტება, ნიშნავს თუ არა ეს, რომ ხერსონი ერთადერთი მიმართულება არაა, სადაც კონტრშეტევა მიმდინარეობს.
„სამხედრო მოქმედებების დეტალებს ვერ განვიხილავ. მინდა, რომ მტერმა ჩვენგან სიურპრიზები მიიღოს“, - აღნიშნა უკრაინის პრეზიდენტმა.
