ვროკავშირის თავდაცვისა და საგარეო საქმეთა მინისტრები შეხვედრებს გამართავენ, სადაც უკრაინული ძალებისთვის სამხედრო სასწავლო მისიის შექმნასა და რუსეთის მოქალაქეებისთვის სავიზო აკრძალვის დაწესებაზე იმსჯელებენ
29 აგვისტო, 2022
ევროკავშირის თავდაცვისა და საგარეო საქმეთა მინისტრები დღეს და ხვალ პრაღაში შეიკრიბებიან, რათა უკრაინული ძალებისთვის სამხედრო სასწავლო მისიის შექმნის ვარიანტები განიხილონ, - ინფორმაციას Reuters-ი ავრცელებს.
სააგენტოს ცნობით, შეხვედრების დროს ასევე განიხილავენ ევროკავშირის ზოგიერთი წევრის მოწოდებას, რუსი ტურისტებისთვის ბლოკის ქვეყნების ტერიტორიაზე შესვლის აკრძალვასთან დაკავშირებით.
ჩეხეთი, რომელიც ამჟამად ევროკავშირის თავმჯდომარე ქვეყანაა, ითხოვს რუსი ტურისტებისთვის ვიზების აკრძალვას ევროკავშირის მასშტაბით. ამ იდეას მხარს უჭერენ ბალტიის ქვეყნები. თუმცა, გერმანია და ზოგიერთი სხვა წევრი ქვეყანა ამგვარ ნაბიჯს არ ეთანხმებიან და ამტკიცებენ, რომ ამან შესაძლოა დაარღვიოს ევროკავშირის წესები და რუს დისიდენტებს ქვეყნიდან გაქცევის გზები მოუჭრას.
ლიეტუვის საგარეო საქმეთა მინისტრმა, გაბრიელიუს ლანდსბერგისმა განაცხადა, რომ ესტონეთმა, ლატვიამ, ლიეტუვამ, პოლონეთმა და ფინეთმა შესაძლოა დამოუკიდებლად იმოქმედონ ტურისტების დაბლოკვის მიზნით, თუ ევროკავშირი არ დათანხმდება ბლოკის მასშტაბით აკრძალვის დაწესებას.
