სერბეთის პრეზიდენტმა, ალექსანდრე ვუჩიჩმა განაცხადა, რომ "სანამ ის უხელმძღვანელებს სერბეთს, ქვეყნის ხელისუფლება არასოდეს დათანხმდება კოსოვოს თვითგამოცხადებული რესპუბლიკის გაეროში გაწევრიანებას".

მისივე თქმით, ბოლო პერიოდში დასავლეთმა ოფიციალურ ბელგრადზე ზეწოლა გააძლიერა, იმისთვის, რომ უკრაინის საკითხთან მიმართებაში "პრეზიდენტ პუტინს და რუსეთის ფედერაციას ხელიდან გამოსტაცოს კოსოვოს არგუმენტის პრეცედენტად გამოყენების შესაძლებლობა".

"როგორც არ უნდა იყოს, მოცემულ მომენტში აღნიშნულ საკითხზე სერბეთის ხელისუფლების ნება არ არსებობს. ამის შესახებ, ჩვენ მთავრობის მეთაურთანაც ვისაუბრეთ (სერბეთის პრემიერ-მინისტრი, ანა ბრნაბიჩი). სანამ მე ვარ ამ ქვეყნის პრეზიდენტი, აღმასრულებელი ხელისუფლება არასოდეს დათანხმდება კოსოვოს დამოუკიდებლობის აღიარებას და გაერო-ს წევრობას", - განაცხადა ვუჩიჩმა მოქალაქეებისადმი მიმართვაში.