ხვიჩა კვარაცხელიამ იტალიის სერია A-ს მიმდინარე სეზონში პირველად ითამაშა „ნაპოლიში”, რომელმაც „სასუოლო“ 2:0 დაამარცხა.

ნეაპოლელების ქართველმა ლეგიონერმა პირველივე შეხვედრაში თავი საგოლე გადაცემით გამოიჩინა.

„სტადიო მარადონაზე“ გამართული დაპირისპირება კვარაცხელიას, რომელმაც პირველი ტურის მატჩი მცირე ტრავმის გამო გამოტოვა, ძირითად შემადგენლობაში არ დაუწყია და მოედანზე მხოლოდ მეორე ტაიმში, 61-ე წუთზე შემოვიდა.

ნეაპოლელები პირველივე წუთებიდან უტევდნენ და სწრაფად დაწინაურდნენ. მატეო პოლიტანოს წაქცევისთვის „სასუოლოს“ კარში მე-16 წუთზე პენალტი დაინიშნა, რომელიც ვიქტორ ოსიმენმა უნაკლოდ შეასრულა და მიმდინარე სეზონში უკვე მესამე გოლი გაიტანა. მე-60 წუთზე „ნაპოლიმ“ მეორე პენალტი მოიპოვა და უპირატესობის გაზრდა შეეძლო, მაგრამ ჯაკომო რასპადორიმ ამ შანსით ვერ ისარგებლა. 61-ე წუთზე კი მოედანზე ხვიჩა კვარაცხელია გამოჩნდა, რომელიც თამაშში შესანიშნავად ჩაერთო – სამ წუთში ქართველმა შემტევმა საგოლე პასით ჯოვანი დი ლორენცო მეკარესთან პირისპირ დატოვა და ნეაპოლელთა კაპიტანმა სხვაობა გაზარდა.

ორი ტურის შემდეგ „ნაპოლიმ“ 6 ქულა დააგროვა და სერია A-ში „მილანთან“ და „ვერონასთან“ ერთად ლიდერობს. მომდევნო შეხვედრას კი „ნაპოლი“ „ლაციოსთან“ 2 სექტემბერს საკუთარ მოედანზე ჩაატარებს.