უზბეკეთის დედაქალაქ ტაშკენტში მიმდინარე მსოფლიოს ჩემპიონატზე საქართველო ძიუდოისტთა ნაკრები წარუმატებლად ასპარეზობს. ბრინჯაოს მედლის მოპოვებასთან ახლოს იყო ვაჟა მარგველაშვილი (-66 კგ), თუმცა გადამწყვეტ შეხვედრაში დამარცხდა.

28 წლის ქართველი ძიუდოსტი ტურნირში მეორე წრიდან ჩაერთო და მაროკოელ აბდერაჰმანე ბუშიტას იპონით სძლია.

მესამე წრეში მარგველაშვილის მეტოქე უკრაინელი კარო მარანდიანი იყო, რომელსაც დამატებით დროში მესამე შიდო მიაღებინა, 1/4-ფინალში კი მარგველაშვილი მსოფლიოს ორგზის ჩემპიონს, იაპონელ იოშირო მარუიამას დაუპირისპირდა და იპონით დამარცხდა.

მარცხის შემდეგ ქართველი სპორტსმენი რეპეშაჟში გადაერთო, სადაც ისრაელის წარმომადგენელ ბარუხ შმაილოვს გაფრთხილებებით აჯობა, თუმცა ბრინჯაოსთვის შეხვედრაში მოლდოველ დენის ვიერუსთან ძალიან დაძაბულ შეხვედრაში, ბოლო წამზე ვაზარით დამარცხდა და მედლის გარეშე დარჩა.

მსოფლიოს 2022 წლის ჩემპიონატს 6-13 ოქტომბერს უზბეკეთი მასპინძლობს და მასში 82 ქვეყნის 570-მდე ძიუდოისტი გამოდის. ტურნირში საქართველო 11 ძუდოისტით (9 კაცი, 2 ქალი) მონაწილეობს. ჩემპიონატის პირველ დღეს ლუხუმ ჩხვიმიანმა (-60) იასპარეზა, რომელიც ასევე უმედლოდ დარჩა.

8 ოქტომბერს ტაშკენტის ტატამიზე საქართველოს ნაკრების ორი წარმომადგენელი გავა. მამაკაცთა შორის 73 კგ-მდე წონით კატეგორიაში ოლიმპიური, მსოფლიოსა და ევროპის ჩემპიონი ლაშა შავდათუაშვილი იასპარეზებს, ქალთა რიგებში კი ევროპის ბრინჯაოს პრიზიორი ეთერ ლიპარტელიანი (-57კგ) იჭიდავებს.