უნგრეთის დედაქალაქში მრავალრიცხოვანი ანტისამთავრობო აქცია გაიმართა. როგორც „ბლუმბერგი“ წერს, ბუდაპეშტის ცენტრში უნგრეთის პრემიერ-მინისტრისა და მისი მთავრობის წინააღმდეგ ათობით ათასი ადამიანი შეიკრიბა.

აქციის მონაწილეებს ხელში უნგრეთისა და ევროკავშირის დროშები ეჭირათ.

დემონსტრაციის გამართვის საბაბი იყო სკანდალი, რომელშიც უნგრეთის მთავრობა მას შემდეგ გაეხვია, რაც ცნობილი გახდა, რომ ქვეყნის პრეზიდენტმა არასრულწლოვანის მიმართ სექსუალური ძალადობის საქმეზე მსჯავრდებული შეიწყალა.

მომხდარის გამო, უნგრეთის პრეზიდენტმა, კატალინ ნოვაკმა თანამდებობა დატოვა. ამის შესახებ მან სატელევიზიო მიმართვაში განაცხადა. თანამდებობიდან გადადგა იუდით ვარგაც, რომელსაც 2023 წელს იუსტიციის მინისტრის თანამდებობა ეკავა და შეწყალებულთა სიის დამტკიცება და პრეზიდენტისთვის მათი საქმის გარემოებების ახსნა სწორედ მის პასუხისმგებლობას წარმოადგენდა. იუდით ვარგა ბოლო პერიოდში უნგრეთის პრემიერ-მინისტრ ვიქტორ ორბანის მმართველი პარტიის Fidesz-ის ევროპულ საარჩევნო კამპანიას ხელმძღვანელობდა.

მიუხედავად ამისა, სკანდალს უნგრეთში დიდი გამოხმაურება მოჰყვა და ცხრა ცნობილმა უნგრელმა ინფლუენსერმა ბუდაპეშტის ცენტრში საპროტესტო აქციის გამართვის მოწოდება გაავრცელა.

უნგრეთში შემდეგი საპარლამენტო არჩევნები 2026 წელს არის დაგეგმილი.